પહેલા વરસાદ સામે વાંધા અરજી

પહેલો વરસાદ આવે ને પછી ગટરો ઉભરાય
ને પાછી ગાયો પણ રસ્તા વચ્ચે બેસી જાય.

દાળવડાનો પછી નીકળે કચ્ચરઘાણ, અને
પહેલા વરસાદમાં મકાઈની લારીઓ ઉભરાય

વરસાદ પહેલા આંધી આવે ને ઘરમાં ધૂળ ધૂળ
પછી સાંજે લાઈટ પર કેટલી જીવાત ઉભરાય !

ને પહેલા વરસાદની જીવાતની જેમજ ઠેરઠેર
કવિઓ ફૂટી નીકળે, ઓરકુટ ફેસબુક છલકાય.

સરકારી તંત્ર મોડું મોડું પછી કામે લાગી જાય,
મ્યુનીસીપાલીટીના રસ્તાઓમાં જ્યારે ભૂવાકાંડ સર્જાય.

'અધીર' પહેલા વરસાદ પછી બીજો આવશે ને ત્રીજો
તમે શાવરમાં જાવ, જોજો. નોકરી હાથથી ના જાય!